游水之番茄篇

登~登~登~登~

輪到小飛魚番茄出場喇~~今次係第二次番茄揾教練學游水,可能係假期嘅關係Ｄ細碼救生衣竟然得番一件,於是到NIZA游水嘅時候番茄件救生衣就比左NIZA著~~不過都難唔到佢, 個衰女包仲好勇敢咁自己跳落水

番茄: NIZA~~我今日狀態唔好所以打交至輸比你!!下次你就知我嘅利害

 

游水之NIZA篇(下)

繼續欣賞下NIZA嘅泳姿先

游水之NIZA篇(上)

今日又同番茄去田園游水，仲有個新朋友仔NIZA添～NIZA係女仔嚟㗎，好活潑好可愛。一見到番茄就係咁同佢玩打架...NIZA活潑嘅程度同MIFFY一樣，有NIZA喺度映得番茄當堂斯文哂NIZA係第一次游水，初初嘅時候都有啲驚㗎佢個樣仲有種被出賣既感覺添，邊個出賣佢？咪係佢爹地囉不過都游得唔錯呀～叻女

NIZA個樣係唔係好似比人出賣咗咁呢？

NIZA游得唔錯呀~~

 

西沙BBQ鄉村小廚

星期日同番茄去咗燒野食，上網睇到個度可以帶狗狗入就去試下，環境都唔錯～～好乾淨～～每位＄118我哋好早去度，好似包場咁～～有人開埋爐，拎埋野食，啱我啲懶人 原來個度有幾個小菜都好出名，有好多人都話好好味嘅脆皮德國鹹豬同埋焗海鮮南瓜盅仲有就係老虎蝦 下次一定要試下～～

行出餐廳直落去就係海灘，不過個日食完之後個天已經開始黑，去沙灘條路又冇街燈，所以冇去到 由於剛到嘅時候餐廳冇人，番茄就好開心咁場內場外周圍跑

場外環境~~

室內有冷氣~~

媽媽：番茄....呢度唔係屋企呀～唔好就圍走啦～～

係唔係好好味咁呢

夜景都好靚架~~

番茄：媽媽，BBQ好好玩呀!!

番茄：啲空氣好好呀～～

 

 

 

 

游水之教練篇（上）

星期六下午同番茄去咗田園寵物酒店度游水，由於塘尾道嘅田園寵物酒店好近我屋企所以已經想去好耐，終於都可以去一試。第一次去田園嘅感覺比我覺得環境好乾淨～～唔錯～唔錯～

啱啱4點可以游水喇我選擇加＄100蚊有教練，因為我覺得番茄有啲怕水，每次都係比我掉佢落水，而唔係自願咁游，雖然係我心目中佢係識游水..不過我就冇諗過比番茄著救生衣 入到泳池教練就第一句問我番茄識唔識游水，我答：應該識...教練話：應該識？應該識我都會見意比佢先著試吓，唔想佢一落水就有好驚嘅感覺~~於是番茄就著咗件超可愛救生衣落水，教練帶到佢去水中心，慢慢放手，佢第一時間9秒9咁游埋嚟我度，仲想上水添.....教練即刻話：佢呢啲唔係識游水係掙扎救生,你見唔見到佢好驚呀？(我當時心諗咁奇怪明明游到，咁都叫掙扎救生)跟住落嚟嘅時間係教練好有心機咁一步一步教番茄游，仲教佢轉彎添，由初初好驚好唔願意到最後佢喺池邊教練叫我叫佢 過嚟，佢竟然可以好勇敢咁喺池邊跳落水游過嚟～～實在太開心喇～～教練話做到呢一步係唔容易需要好大嘅勇氣超過歲半嘅狗狗學游水要識做到呢個動作至少要4堂甚至更多嘅時間....之後佢仲可以我喺池邊上面一路行佢就一路跟住我游，雖然全程教練都係水裡面跟住佢，但係至少佢肯游已經好好喇～～開心C～～

當初我都有諗過幫番茄叫個教練教佢會唔會好無謂，但係原來我嘅選擇係完全正確架～原來以往我帶佢去游水，強迫性咁捉佢落水我只會令佢更加抗拒游水，我更加唔識用方法去教佢其間從教練口中知道原來狗狗係一歲前游水對骨骼嘅成長係好好架，教練仲話由其是POODLE嘅骨比較容易有問題，佢話好多POODLE都有脫臼嘅情況，游水更加係最好嘅醫治方法...教練仲話佢曾經教過一隻脫臼都幾嚴重嘅POODLE，醫生建議要做手術，POODLE游咗三堂水之後情況已經明顯有好轉，最後都唔需要做手術～～

見到番茄游得咁開心，我都好好開心呀～～

番茄：奶茶~~我下次會係水度強槍你個"必必"!!!!

 

游水之教練篇（下）

喺田園寵物酒店游水收費係＄160...包括游水之前沖身同游完水之後沖涼及吹乾， 如果要做其他嘅美容例如修毛，剪甲，洗耳，洗眼仔等等就另加＄120。仲可以加＄100蚊做原價＄300蚊嘅SPA添～～個日見番茄啲指甲好長所以就加咗＄120蚊幫佢做埋美容，我冇諗過佢會幫番茄修毛毛，因為番茄係CAROL姐姐架嘛

我仲加咗＄100蚊幫番茄做咗個一生人第一次嘅SPA添，SPA包括泡泡浴，按頭，按耳，按淋巴，按肩背，按臀部同按手腳，嘩～C服屎～～當番茄搞掂哂出到嚟我至睇到佢修左毛毛，唔靚嘅，唔制呀～～～連眼仔毛都冇CAROL姐姐修得咁靚～～ 不過好彩都係比佢剪左少少嗟～～

我買左個游水套票，買5送1，抵～抵～抵～

番茄：媽媽～原來游水好好玩架

番茄：媽媽，我唔開心～我要CAROL姐姐幫我修毛毛