星期五晚返到香港, 星期六就第一時間去接返番茄，去到奶皮媽門口我冇入到去，但係番茄好似知我喺出面咁，佢見到我開心到不得了～～好彩仲認得我同冇嬲到我
，我聖誕節去咗四日旅行嬲咗我一晚唔采我喎～～
奶皮媽話佢可能感應到我嗰朝去接佢就神早斟咗杯大茶比佢飲
唔止咁添呀，喺五日裡面佢同奶茶麥皮粉碎咗三大張尿片，等奶奶同老爺一早就同佢哋三個吸塵抹地，真係世界變囉~~因為番茄一定要去籠度大小便，而奶茶麥皮又對籠裡面嘅尿片特別有興趣咪搞成咁囉... 奶皮媽唔好意思呀，第時你哋去旅行我會義不容辭赴湯蹈火咁服侍返佢哋
據聞五日裡面番茄嘅節目就係同奶茶麥皮打過你死我活，佢到今日仲未恢復體力，仍然係日瞓夜瞓，今朝佢同我一齊瞓到11點
星期六去接番茄就順便去埋寵物綠洲玩，可能新年嗰幾日太凍冇去街街，所以嗰日個個都跑到好開心，連平時唔多跑嘅麥皮都係咁跑玩得好開心～～
其實番茄今日不知幾開心，佢扮哂憂鬱影相咋~~
睇吓奶茶仔今日幾開心~~
原來今日返而影得最少係麥皮，下次補返數~~
情侶合照一張
睇吓番茄幾開心!!
難得一張一齊望鏡頭嘅合照!!
琴日約咗奶皮媽去寵物展，我哋都冇帶狗狗去，因為驚住好多人，帶住佢哋又買唔到野喎～我哋大約3點去到，都幾多人㗎～我覺得迫過上次東涌但係就多野睇過上次～
最近諗住同番茄轉糧，佢食咗CANIDAE之後其實冇咩唔好，我只係想比隻質數好少少嘅糧佢食, 於是就順便睇埋～行咗冇幾耐就見到NANO，可能太多人喇，NANO比媽媽抱住行，個樣好嗲呀～～ 今次嘅收穫唔係好多，因為番茄已經太多零食，所以我就淨係買咗個芝士蛋糕比佢食， 買咗個必必比佢，同成功轉咗隻糧～～ 奶皮媽見我冇買咩零食比番茄就醒咗包鮭魚刺身比佢，發達啦～～ 個芝士蛋糕番茄就食到LAM LAM俐～～
我幫番茄轉咗OVEN-BAKED呢隻加拿大糧，上次去東涌我已經有D想試，不過最後都冇買到～ 我買咗6磅＄178，仲送咗4包SAMPLE比我添～聽講呢隻糧係低溫慢火烘焗烹調，純天然，無添加食材～佢哋嘅三文魚係用大西洋嘅深海三文魚，佢哋嘅雞就用北美走地雞, 至於羊肉就用紐西蘭羊～個SALES講解嘅時候好好笑，第一句就話我哋唔會好似有D糧咁用大陸雞....成包糧裡面有3.25％OMEGA6，450MG/KG係保護關節嘅葡萄糖胺～我幫番茄揀咗三文魚味～～而家番茄食緊CANIDAE＄135蚊5磅，一包糧食好耐㗎，其實都係貴少少嗟～～
好快又到新年，最近好忙唔知仲有冇時間寫多次BLOG呢，今年番茄會去7星級酒店暫住5日，呢間酒店設備齊全，有專人服侍仲有遊戲時間，我可以一萬個放心去旅行喇
～～ 邊間7星級酒店？？咪奶皮媽屋企囉～～真係麻煩哂你喇～～番茄會好好服侍你個仔同朝早斟茶比你兩老㗎喇
