訓練課程

我已經決定比番茄到澳美犬隻訓練中心上堂喇, 一共上6堂, 第一堂係2小時理論堂(不用帶狗狗上的), 第二至第五堂就同狗狗一齊上堂, 個課程係叫”行為理論+服從訓練”, 課程完左後會有證書….

比番茄讀呢個課程我主要係想佢糾正行為上既問題, 而呢個課程亦都係為有行為問題既狗狗而設, 例如行街扯繩(番茄暫時得呢樣未有!!), 撲狗(番茄通常係比狗撲..哈哈),番茄係屬於怕事不懂社交個一類(呢類都係屬於行為問題), 見到人好興奮個時會亂撲, 想得到一樣野比如食物或者玩具而得唔到既時候會吠人, 鍾意胡亂咬野, 隨處大小便問題等等….

講起隨處大小便, 我就非常之煩惱…話說我已經好肯定番茄識去正確地方大小便, 但係佢琴晚竟然係我面前尿尿, 由佢識去廁所之後已經係第二次喇!! 佢仲要用好得戚既樣望住我屙…. 咁我咪即刻捉住佢鬧囉, 仲打佢pat pat添…跟住捉佢入籠同佢講 “要係呢度屙…知唔知??”…. 佢就即刻黎個大小各一, 睇到佢個得戚樣實在令我懷疑佢夠竟知唔知道佢應該係邊度便便……如果唔知咁點解鬧完佢之後一捉佢入籠就即刻又去一次呢??唔通對佢黎講呢種就係挑戰?? 定係我唔識同佢溝通比個正確信息佢呢??希望番茄上完堂之後就會乖d啦~~

 

番茄 : 媽媽~~邊個行為有問題要上堂呀?

媽媽 : 你囉!!!!